ביר איז ניט קיין געטראַנק, וואָס קומט באַלד אין זינען, אַז מע דערמאָנט ישׂראל אָדער די מיזרח־אייראָפּעיִשע ייִדן. אַ נײַע ישׂראלדיקע פֿירמע, מיטן נאָמען „וילדע־חייע‟ (ווילדע חיה), וועט אפֿשר בײַטן די מיינונג.
די פֿירמע, וואָס האָט זיך לחתּכילה אָנגעהויבן ווי אַן אַקאַדעמישער פּראָיעקט פֿון אַ גרופּע קונסט־סטודענטן אינעם קאָלעדזש „המכללה האקדמית‟, וואָס געפֿינט זיך אינעם טאָל „עמק יזרעאל‟ ניט ווײַט פֿון עפֿולה, שטעלט פֿאָר אַ ריי מינים ביר. יעדער סאָרט ביר טראָגט דעם נאָמען פֿון אַ פֿיקטיוון מוזיקער, וואָס שפּילט כּלומרשט אין אַ קלעזמער־קאַפּעליע אין עפּעס אַ פֿאַרוואָרפֿן שטעטל. דער נאָמען און אויסגעטראַכטער הינטערגרונט פֿון יעדן סאָרט ביר גיט איבער דעם טעם פֿונעם פּראָדוקט. איין ביר, למשל, מיטן נאָמען „אַרטעק בנימין צוקערקענדל‟ האָט אַ פֿידלער פֿאַר אַ מאַסקאָט. די אויפֿשריפֿט אויפֿן פֿלעשל גיט צו פֿאַרשטיין, אַז „אַזוי ווי אַ פֿידל, ליגט דער דאָזיקער ביטערער ביר אויפֿן ראַנד פֿון פֿרייד און טרויער‟. אַנדערע בירן אין דער סעריע הייסן „זעלדע מיינע־גרעפּס‟ און זײַן מאַסקאָט איז אַ משוגענע פֿרוי, וואָס וווינט אינעם „שטעטל‟ און „יאָשקעלע בייגעלע שמענדריק‟, וואָס איז אַ קלאַרנעט־שפּילער.
די רעקלאַמעס פֿאַרן ביר, וואָס מע קען זען אויף „יו־טוב‟, באַשטייען פֿון קלעזמער־מוזיק און קליינע פֿלעשלעך, וואָס טאַנצן עפּעס אַ כּמו־ייִדיש טענצל. אויף דער וועבזײַט פֿון דער פֿירמע קען מען אויך לייענען די „הינטערגרונטן‟ פֿון די מאַסקאָטן, נאָך וועמען די בירן הייסן. עס טרעפֿט זיך, אַז „אַרטעק בנימין צוקערקענדל‟, „זעלדע מיינע־גרעפּס‟ און „יאָשקעלע בייגעלע שמענדריק‟, זענען אַלע נעבעכדיקע פּאַרשוינען, וואָס האָבן ניט קיין שום טרייסט אין לעבן, אַחוץ זיך אָנצושיכּורן און שפּילן אין זייער טרויעריקער קאַפּעליע.
לויט די רעצענזיעס פֿון די ביר־מומחים, האָבן די „ווילדע־חיה‟־בירן אַ גוטן טעם און אַ „גלאַטיקע פֿאַקטור‟. ליידער האָבן זיי, אָבער, ניט קיין ייִדישן טעם. בײַם איבערקוקן די פּירסום־מאַטעריאַלן זעט עס אויס, אַז די פּראָדוקטן פֿאַרשאַפֿן ניט קיין כּבֿוד פֿאַרן אַמאָליקן ייִדישן שטעטל, נאָר מאַכן חוזק פֿון אַ געוויסן סטערעאָטיפּישן אימאַזש. צוריק געשמועסט, האָבן אין שטעטל סײַ ווי סײַ ווייניק ייִדן געטרונקען ביר.
Read more: http://yiddish.forward.com/articles/193827/beer-with-a-jewish-flavor/#ixzz3xGSljDRI
